Pepe Espaliú Liburutegia
Amaitu berria da Pepe Espaliuren liburutegia katalogatzeko lana. Online kontsultagai dago jada Librivisionen bitartez. Online egiten diren kontsultetan Artelekuko liburutegi osoa batera agertzen bada ere, Pepe Espaliuren liburutegia fisikoki banatua mantendu da, Artelekun bere osotasuna gorde eta izaera berezia manten dezan.
Pepe Espaliú eta Artelekuren arteko harremanak 1989an hasi ziren, Pepe
Espaliúk Juan Muñozek zuzendutako tailer batean parte hartu zuenean.
Hiru urte beranduago, berak zuzendu zuen "La voluntad residual:
parábolas del desenlace”.
1992ko irailaren 26an “The Carrying”
ekintza/perfomancea burutu zuen Donostiako Zinemaldia bitartean.
Ekintza/performance horretan, bikote batzuk Pepe Espaliú besotan
hartuta garraiatu zuten Maria Cristina hoteletik Alderdi Eder
parkeraino, aulki batean eserita balego bezala eta ibilbide osoan
lurrik ukitu gabe. Ekintza/performancearen bitartez, IHESAri buruzko
eztabaida piztu nahi izan zen gizartean, une horretan, gaixotasuna
estigmatizatua baitzegoen.
1993an, hil aurretik, Pepe Espaliúk
bere liburutegia eman zion Gipuzkoako Foru Aldundiko Artelekuri. Modu
berean, Artelekuk hitz eman zuen liburutegia mantendu, sustatu eta
hedatu egingo zuela. 2003 eta 2004. urteetan funtsaren katalogazioa
egin zen eta orain ikusgarri dago sarean.
LIBURUTEGIAREN DESKRIBAPENA
Liburutegiak
Pepe Espaliúren bizitza, gustuak, zaletasunak eta ikasketak islatzen
ditu. Guztira lau mila bostehun liburuki jasotzen ditu (dokumentu
berriak eta liburuki errepikatuak) arteari, filosofiari edo
literaturari buruzko monografia eta aldizkako argitalpenen artean.
Arteari
buruzko liburu eta katalogoetan argi eta garbi ikusten da autoreari
arte garaikidea asko interesatzen zitzaiola, baina ez garaikidea
bakarrik, baita primitiboa, historiaurrekoa edo kolonaurrekoa ere.
Liburu askotan azaltzen dira Afrika eta kolonaurreko herrietako arteari
buruzko ikerketak, eta baita Antzinako Ekialdeko eta Asiako artea ere.
Kultura
klasikoko, Erdi Aroko eta Errenazimenduko kulturen arteari buruzko
monografiak ere badaude, besteak beste, Michelangelori, Raphaeli eta
Velazkezi buruzko ikerketak, eta Errenazimenduko eskulturari eta
barrokoko arkitekturari buruzkoak.
Azkenik, artearen
historiari buruzko liburuen artean nabarmentzekoak dira XIX eta XX.
mendeetako artistei eta joera artistikoei buruzko ikerlanak.
